Marceau etorbideko eraikina
1936an, Parisko Marceau etorbideko 11. zenbakian zegoen etxea Hélène Brawn estatubatuarrarena zen. Urte hartako udan Espainiar estatuan guda zibila hasi zelarik, urte bereko irailean, eta historiak eman duen Euzkadiko lehen Jaurlaritza eratu baino lehen, Euzko Alderdi Jeltzaleak eraikin hura erosteko behar zen dirua lortu zuen, Amerikan bizi ziren euskal abertzaleek egin zituzten ekarpenei esker.
1939ko hasieran Frantziako agintariak frankistei garaipena aitortzekotan zeudela, alderdi jeltzaleko buruek Finances et Entreprises sozietate anonimoa eratzea erabaki zuten, Frantzian zituzten ondasunak babesteko. 1939ko otsailean, sozietate honek Marceau etorbideko 11.ean zegoen jabetza eskuratu zuen 1.600.000 liberaren truke. Geroago, 1939ko abenduaren 18an, Finances et Entreprises enpresak eraikina alokatu zion L.I.A.B.ri. (Euskaldunen Lagunen Nazioarteko Liga). Honek Euzko Jaurlaritzaren Ordezkaritzari alokatu zion, trukean kargurik ezarri gabe.
Gerra zibila amaitu zenean, 1940ko urtarrileko lege frankistak Espainiako Estatuaren jabetza deklaratu zituen ondasun errepublikar guztiak, Estatu barrukoak zein kanpokoak. Alemaniako indarrek Paris okupatu zutenean, agintari frankistek, Gestaporen laguntzarekin, indarrez hartu zuten eraikina, arpilatu eta "Espainiar Etxe" bihurtu zuten, bai eta Frantziako hiriburuko Espainiako Falangearen egoitza ere. Bere instalazioak polizia-jardueretarako ere erabili ziren, eta, batez ere, Berreskuratze Batzordearenak, ondasunak konfiskatzeko, eta jarduera horietarako egoitza jarri zuten Parisen Marceau etorbideko 11ko eraikinean. 1943an, Frantziako gobernu kolaborazionistak epaia eman zuen Finances et Entreprises-en ondasun guztiak Espainiako gobernuari emanez, eta hurrengo urtean, Frantziako auzitegiak berriro ere Espainiako Estatuaren alde erabaki zuen, eta konfiskatutako ondasun guztiak bere jabetzapean erregistratu ziren.
1944ko abuztuan, Paris askatu aurretik, frankistek eraikinetik alde egin zuten. Euskaldun talde batek, Leclerceko armadako soldaduekin batera, eraikina berreskuratu zuen. Xabier Landaburu, L.I.A.B.ko idazkari nagusia, eta Agustin Alberro, euskal Ordezkaritzako kidea, egoitzan instalatu ziren berriro. Hala ere, hilabete horren amaieran, Espainiak Parisen zuen kontsulak eraikina erreklamatu zuen. Nahiz eta euskaldunek nazismoaren urteetan emandako lege frantsesak indargabetzeko ahalegin handiak egin, 1951ko ekainaren 28an, azkenean Euzko Jaurlaritza bere egoitzatik bota zuten.
